Perde 4
Charmides
Eloquere, isti tibi quid homines debent, quos tu quaeritas?
Sycophanta
Pater istius adulescentis dedit has duas mi epistulas,
Lesbonici. is mi est amicus.
895
Charmides
Teneo hunc manifestarium.
895
me sibi epistulas dedisse dicit. ludam hominem probe.
Sycophanta
Ita ut occepi, si animum advortas, dicam.
Charmides
Dabo operam tibi.
Sycophanta
Hanc me iussit Lesbonico suo gnato dare epistulam,
et item hanc alteram suo amico Callicli iussit dare.
Charmides
Mihi quoque edepol, quom hic nugatur, contra nugari lubet.
900
Sycophanta
Bene rem gerebat.
Charmides
Ab ipson istas accepisti?
Sycophanta
E manibus dedit mi ipse in manus.
Charmides
Qua facie est homo?
Sycophanta
Sesquipede quiddamst quam tu longior.
Charmides
Haeret haec res, siquidem ego apsens sum quam praesens longior.
