Perde 2
[Textpart 4]
Audi cetera.
Stasimvs
post id, frumenti quom alibi messis maximast,
tribus tántis illi minus redit quam opseveris.
530
Philto
Em istic oportet opseri mores malos,
si in opserendo possint interfieri.
Stasimvs
Neque umquam quisquamst, quoius ille ager fuit,
quin pessume ei res vorterit: quoium fuit,
alii exulatum abierunt, alii emortui,
535
alii se suspendere. em nunc hic quoius est,
Philto
Apage a me istum agrum.
Stasimvs
Magis apage dicas, si omnia ex me audiveris.
nam fulguritae sunt alternae árbores;
sues moriuntur angina acerrume;
540
oves scabrae sunt, tam glabrae, em, quam haec est manus.
tum autem Surorum, genus quod patientissumumst
hominum, nemo extat qui ibi sex menses vixerit:
ita cuncti solstitiali morbo decidunt.
Philto
Credo ego istuc, Stasime, ita esse; sed Campans genus
545
multo Surorum iam antidit patientia.
