Perde 3
[Textpart 3]
Quasi militi animum adieceris, simulare.
Acrotelevtivm
Sic futurum est.
Palaestrio
Quasique ea res per me interpretem et tuam ancillam ei curetur.
910
Acrotelevtivm
Bonus vátes poteras esse, nam quae sunt futura dicis.
Palaestrio
Quasique anulum hunc ancillula tua abs té detulerit ad me,
quem ego militi porro darem tuis verbis.
Acrotelevtivm
Vera dicis.
Periplectomenvs
Quid istís nunc memoratis opust quae commeminere?
nam, mi patrone, hoc cogitato, ubi probus est architectus,
915
bene lineatam si semel carinam conlocavit,
facile esse navem facere, ubi fundata, constitutast.
nunc haec carina satis probe fundata, bene statutast,
atque architecto adsunt fabri ad eam rem haud imperiti.
si non nos materiarius remoratur, quod opus qui det
920
(novi indolem nostri ingeni), cito erit parata navis.
Palaestrio
Nempe tú novisti militem meum erum?
Acrotelevtivm
Rogare mirumst.
populi odium quidni noverim, magnidicum, cincinnatum,
