Perde 5
[Textpart 7]
nisi quidem vos vostra crura aut latera nihili penditis.
Senex
cave quisquam, quod illíc minitetur, vostrum flocci fecerit.
quid státis? quid dubitátis? iam sublímen raptum opórtuit.
995
ego ibo ad medicum: praesto ero illi, cum venietis.
quid hoc ést negoti? quid illisce homines ad me currunt, opsecro?
quid voltis vos? quid quaeritatis? quid me circumsistitis?
quo rapitis me? quo fertis me? perii, opsecro vestram fidem,
Epidamnienses, subvenite, cives. quin me mittitis?
1000
Messenio
Pro di immortales, obsecro, quid ego oculis aspicio meis?
erum meum indignissime nescio qui sublimen ferunt.
Menaechmvs
Ecquis suppetias mihi audet ferre?
Messenio
Ego, ere, audacissime.
o facinus indignum et malum, Epidamnii cives, erum
meum hic in pacato oppido luci deripier in via,
1005
qui liber ad vos venerit.
Menaechmvs
Obsecro te, quisquis es, operam mihi ut des,
neu sinas in me insignite fieri tantam iniuriam.
Messenio
Immo et operam dabo et defendam et subvenibo sedulo.
