Epeisodion 6
Ἄγγελος
θαρσεῖτε, παῖδες μητέρων τεθραμμέναι.
πόλις πέφευγεν ἥδε δούλιον ζυγόν·
πέπτωκεν ἀνδρῶν ὀβρίμων κομπάσματα·
πόλις δʼ ἐν εὐδίᾳ τε καὶ κλυδωνίου
795
πολλαῖσι πληγαῖς ἄντλον οὐκ ἐδέξατο.
στέγει δὲ πύργος, καὶ πύλας φερεγγύοις
ἐφραξάμεσθα μονομάχοισι προστάταις·
καλῶς ἔχει τὰ πλεῖστʼ, ἐν ἓξ πυλώμασι·
τὰς δʼ ἑβδόμας ὁ σεμνὸς ἑβδομαγέτης
800
ἄναξ Ἀπόλλων εἵλετʼ, Οἰδίπου γένει
κραίνων παλαιὰς Λαΐου δυσβουλίας.
Χορός
τί δʼ ἔστι πρᾶγμα νεόκοτον πόλει πλέον;
Ἄγγελος
πόλις σέσωσται· βασιλέες δʼ ὁμόσποροι—
Χορός
τίνες; τί δʼ εἶπας; παραφρονῶ φόβῳ λόγου.
805
Ἄγγελος
φρονοῦσα νῦν ἄκουσον· Οἰδίπου τόκοι —
Χορός
οἲ ʼγὼ τάλαινα, μάντις εἰμὶ τῶν κακῶν.
Ἄγγελος
οὐδʼ ἀμφιλέκτως μὴν κατεσποδημένοι—
Χορός
ἐκεῖθι κεῖσθον ; βαρέα δʼ οὖν ὅμως φράσον.
Ἄγγελος
ἅνδρες τεθνᾶσιν ἐκ χερῶν αὐτοκτόνων.
810
Χορός
οὕτως ἀδελφαῖς χερσὶν ἠναίρονθʼ ἅμα ;
οὕτως ὁ δαίμων κοινὸς ἦν ἀμφοῖν ἄγαν.
αὐτὸς δʼ ἀναλοῖ δῆτα δύσποτμον γένος.
τοιαῦτα χαίρειν καὶ δακρύεσθαι πάρα·
πόλιν μὲν εὖ πράσσουσαν, οἱ δʼ ἐπιστάται,
815
δισσὼ στρατηγώ, διέλαχον σφυρηλάτῳ
Σκύθῃ σιδήρῳ κτημάτων παμπησίαν.
ἕξουσι δʼ ἣν λάβωσιν ἐν ταφῇ χθονός,
πατρὸς κατʼ εὐχὰς δυσπότμως φορούμενοι.
πόλις σέσωσται· βασιλέοιν δʼ ὁμοσπόροιν
820
πέπωκεν αἷμά γαῖʼ ὑπʼ ἀλλήλων φόνῳ.