Stasimon 5
[Episode]
εἰδότι τοί μοι τάσδʼ ἀγγελίας
1040
Προμηθεύς
ὅδʼ ἐθώυξεν· πάσχειν δὲ κακῶς
ἐχθρὸν ὑπʼ ἐχθρῶν οὐδὲν ἀεικές.
πρὸς ταῦτʼ ἐπʼ ἐμοὶ ῥιπτέσθω μὲν
πυρὸς ἀμφήκης βόστρυχος, αἰθὴρ δʼ
ἐρεθιζέσθω βροντῇ σφακέλῳ τʼ
1045
ἀγρίων ἀνέμων· χθόνα δʼ ἐκ πυθμένων
αὐταῖς ῥίζαις πνεῦμα κραδαίνοι,
κῦμα δὲ πόντου τραχεῖ ῥοθίῳ
ἄστρων διόδους· εἴς τε κελαινὸν
1050
Τάρταρον ἄρδην ῥίψειε δέμας
τοὐμὸν ἀνάγκης στερραῖς δίναις·
πάντως ἐμέ γʼ οὐ θανατώσει.
Ἑρμῆς
τοιάδε μέντοι τῶν φρενοπλήκτων
βουλεύματʼ ἔπη τʼ ἔστιν ἀκοῦσαι.
1055
τί γὰρ ἐλλείπει μὴ οὐ παραπαίειν
ἡ τοῦδʼ εὐχή; τί χαλᾷ μανιῶν;
ἀλλʼ οὖν ὑμεῖς γʼ αἱ πημοσύναις
συγκάμνουσαι ταῖς τοῦδε τόπων
μετά ποι χωρεῖτʼ ἐκ τῶνδε θοῶς,
1060
βροντῆς μύκημʼ ἀτέραμνον.
Χορός
ἄλλο τι φώνει καὶ παραμυθοῦ μʼ
ὅ τι καὶ πείσεις· οὐ γὰρ δή που
τοῦτό γε τλητὸν παρέσυρας ἔπος.
1065
πῶς με κελεύεις κακότητʼ ἀσκεῖν;
μετὰ τοῦδʼ ὅ τι χρὴ πάσχειν ἐθέλω·
τοὺς προδότας γὰρ μισεῖν ἔμαθον,
τῆσδʼ ἥντινʼ ἀπέπτυσα μᾶλλον.
1070
Ἑρμῆς
ἀλλʼ οὖν μέμνησθʼ ἁγὼ προλέγω
μηδὲ πρὸς ἄτης θηραθεῖσαι
μέμψησθε τύχην, μηδέ ποτʼ εἴπηθʼ
ὡς Ζεὺς ὑμᾶς εἰς ἀπρόοπτον
πῆμʼ εἰσέβαλεν· μὴ δῆτʼ αὐταὶ δʼ
1075
κοὐκ ἐξαίφνης οὐδὲ λαθραίως
εἰς ἀπέρατον δίκτυον ἄτης
ἐμπλεχθήσεσθʼ ὑπʼ ἀνοίας.
Προμηθεύς
καὶ μὴν ἔργῳ κοὐκέτι μύθῳ
1080
βρυχία δʼ ἠχὼ παραμυκᾶται
βροντῆς, ἕλικες δʼ ἐκλάμπουσι
στεροπῆς ζάπυροι, στρόμβοι δὲ κόνιν
εἱλίσσουσι· σκιρτᾷ δʼ ἀνέμων
1085
πνεύματα πάντων εἰς ἄλληλα
στάσιν ἀντίπνουν ἀποδεικνύμενα·
ξυντετάρακται δʼ αἰθὴρ πόντῳ.
τοιάδʼ ἐπʼ ἐμοὶ ῥιπὴ Διόθεν
τεύχουσα φόβον στείχει φανερῶς.
1090
ὦ μητρὸς ἐμῆς σέβας, ὦ πάντων
αἰθὴρ κοινὸν φάος εἱλίσσων,
ἐσορᾷς μʼ ὡς ἔκδικα πάσχω.