Book 1
66
Media circiter nocte eis, qui aquandi causa I longius a castris processerant, ab equitibus correptis fit ab his certior Caesar duces adversariorum I silentio copias castris educere. Quo cognito signum I dari iubet et vasa militari more conclamari. Illi exaudito clamore veriti, ne noctu impediti sub onere I confligere cogerentur aut ne ab equitatu Caesaris in I angustiis tenerentur, iter supprimunt copiasque in I castris continent. Postero die Petreius cum paucis equitibus occulte ad exploranda loca proficiscitur. Hoc idem fit ex castris Caesaris. Mittitur L. Decidius Saxa cum paucis, qui loci naturam perspiciat. Uterque idem suis renuntiat: V milia passuum proxima intercedere itineris campestris, inde excipere loca aspera et montuosa; qui prior has angustias occupaverit, ab hoc hostem prohiberi nihil esse negotii.
