Book 6
Ut sese permensi oculis et uterque priorem
760
speravere locum, non protinus ira nec ictus:
alternus paulum timor et permixta furori
consilia, inclinant tantum contraria iactu
bracchia et explorant caestus hebetantque ferendo,
doctior hic differt animum metuensque futuri
765
cunctatus vires dispensat: at ille nocendi
prodigus incautusque sui ruit omnis et ambas
consumit sine lege manus atque inrita frendit
insurgens seque ipse premit, sed providus astu
et patria vigil arte Lacon hos reicit ictus,
770
hos cavet; interdum nutu capitisque citati
integer obsequio, manibus nunc obvia tela '
discutiens, instat gressu voltuque recedit:
saepe etiam iniustis conlatum viribus hostem —
is vigor ingenio, tanta experientia dextrae est —
775
ultro audax animis intratque et obumbrat et alte
adsilit. ut praeceps cumulo salit unda minantes
in scopulos et fracta redit, sic ille furentem
circuit expugnans; levat ecce diuque minatur
in latus inque oculos; illum rigida arma caventem
780
avocat ac manibus necopinum interserit ictum
callidus et mediam designat volnere frontem:
iam cruor, et tepido signantur tempora rivo.
nescit adhue Capaneus subitumque per agmina murmur
miratur; verum ut fessam super ora reduxit
785
forte manum et summo maculas in vellere vidit,
non leo, non iaculo tantum indignata recepto
tigris: agit toto cedentem fervidus arvo
praecipitatque retro iuvenem atque in terga supinat,
dentibus horrendum stridens, geminatque rotatas
790
multiplicatque manus, rapiunt conamina venti,
pars cadit in caestus; motu Spartanus acuto
mille cavet lapsas circum cava tempora mortes
auxilioque pedum, sed non tamen immemor artis
adversus fugit et fugiens tamen ictibus obstat.
795
Et iam utrumque labor suspiriaque aegra fatigant.
tardius ille premit, nee iam hic absistere velox,
defectique ambo genibus pariterque quierunt.
sic ubi longa vagos lassarunt aequora nautas
