Tarpeio spectanda Iovi: caelata metallo
1
classis ut auratum sulcaret remige fluctum,
ut Massyla tuos anteirent oppida currus
Palladiaque comas innexus harundine Triton
edomitis veheretur aquis et in aere trementem
succinctae famulum fervent Atlanta cohortes,
ipse Iugurthinam subiturus carcere poenam
praeberet fera colla iugo, vi captus et armis,
non Bocchi Syllaeque dolis. Sed prima remitto.
num praesens etiam Getici me laurea belli
declinare potest? sedesve capacior ulla
tantae laudis erit? tua te benefacta morantem
conveniunt, meritisque suis obnoxia virtus
quod servavit amat. iam flavescentia centum
messibus aestivae detondent Gargara falces,
spectatosque iterum nulli celebrantia ludos
circumflexa rapit centenus saecula consul:
his annis, qui lustra mihi bis dena recensent,
nostra ter Augustos intra pomeria vidi,
temporibus variis; eadem sed causa tropaei
civilis dissensus erat. venere superbi,
scilicet ut Latio respersos sanguine currus
adspicerem ! quisquamne piae laetanda parenti
natorum lamenta putet? periere tyranni,
sed nobis periere tamen. cum Gallica vulgo
proelia iactaret, tacuit Pharsalica Caesar.
namque inter socias acies cognataque signa
ut vinci miserum, numquam vicisse decorum,
restituat priscum per te iam gloria morem
verior, et fructum sincerae laudis ab hoste
desuetum iam redde mihi iustisque furoris
externi spoliis sontes absolve triumphos.
Quem, precor, ad finem laribus seiuncta potestas
exulat imperiumque suis a sedibus errat?
cur mea quae cunctis tribuere palatia nomen
neglecto squalent senio? nec creditur orbis
illinc posse regi? medium non deserit umquam
caeli Phoebus iter, radiis tamen omnia lustrat.
segnius an veteres Histrum Rhenumque tenebant,
qui nostram coluere domum? leviusve timebant
