Perde 4
[Textpart 2]
iam ubi líber ero, igitúr demum instrúam agrum atque aedis, máncipia,
930
Gripvs
navíbus magnis mercáturam faciam, ápud reges rex pérhibebor.
post ánimi causa míhi navem faciam átque imitabor Strátonicum,
ubi nóbilitas mea erít clara,
oppídum magnum commúnibo, ei ego úrbi Gripo indám nomen,
moniméntum meae famae ét factis, ibi quí regnum magnum ínstituam.
935
magnas res hic agito in mentem instruere. nunc hunc vidulum condam.
sed hic réx cum aceto pránsurust et sále, sine bono pulménto.
Trachalio
Dum hánc tibi, quam tráhis, rudentem cómplico.
Trachalio
At pol ego te ádiuvo nam bónis quod bene fit haúd perit.
Gripvs
Turbída tempestas héri fuit,
940
nil hábeo, adulescens, píscium, ne tú mihi esse póstules;
non vídes referre me úvidum reté, sine squamosó pecu?
Trachalio
Non édepol piscis éxpeto quam tuí sermonis sum índigens.
Gripvs
Enícas iam me odio, quísquis es.
Trachalio
Non sínam ego abire hinc té. mane.
