Perde 3
Collybiscvs
At pol ego eum, qua sit facie, nescio.
eum mihi volo demonstretis hominem.
Agorastocles
Hic trecentos nummos numeratos habet.
Advocati
Ergo nos inspicere oportet istuc aurum, Agorastocles,
595
ut sciamus quid dicamus mox pro testimonio.
Collybiscvs
Agite, inspicite.
Advocati
Aurum est profecto hoc, spectatores, comicum:
macerato hoc pingues fiunt auro in barbaria boves;
verum ad hanc rem agundam Philippum est: ita nos adsimulabimus.
Collybiscvs
Sed ita adsimulatote quasi ego sim peregrinus.
600
et quidem quasi tu nobiscum adveniens hodie oraveris,
liberum ut commostraremus tibi locum et voluptarium,
ubi ames, potes, pergraecere.
Collybiscvs
Eu, edepol mortales malos.
Agorastocles
Ego enim docui.
