Perde 4
[Textpart 1]
Sí quid est homini míseriarum quód miserescat, míser ex animost.
Philippa
íd ego expérior, cui múlta in unúm locum
cónfluont, quaé meum péctus pulsánt simul:
multiplex aerumna me exercitam habet,
paupértas, pavór territát mentem ánimi,
530
neque úbi meas spes cóllocem habeo úsquam munitúm locum.
ita gnáta mea hostiumst potita, neque ea nunc ubi sit scio.
Periphanes
Quis illaec est mulier, timido pectore peregre adveniens
Philippa
In his dictust locis habitare mihi
Periphanes
Me nominat haec; credo ego illi hospitio usus venit.
535
Philippa
Pervelim mercedem dare, qui monstret eum mihi hominem aut ubi habitet.
Periphanes
Noscito ego hanc, nam videor nescio ubi mi vidisse prius.
éstne ea an nón east quam animus retur meus?
Philippa
Di boni, visitavi antidhac?
Periphanes
Certo eást quam in Épidauro paupérculam memini cómprimere.
540
Philippa
Plane hícine est, qui mihi in Épidauro primús pudicitiam pépulit.
Periphanes
Quaé meo compréssu peperit fíliam quam dómi nunc habeo.
