Perde 3
[Textpart 3]
Cur tu, obsecro, immerito meo me morti dedere optas?
Argyrippvs
Ego te? quam si intellegam deficere vita, iam ipse
vitam meam tibi largiar et de mea ad tuam addam.
610
Philaenivm
Cur ergo minitaris mihi, te vitam esse amissurum?
nam quid me facturam putas, si istuc quod dicis faxis?
mihi certum est facere in me omnia eadem quae tu in te faxis.
Argyrippvs
Oh melle dulci dulcior tu es.
Philaenivm
Certe enim tú vita es mi.
Argyrippvs
Facio lubens.
615
Philaenivm
Vtinam sic efferamur.
615
Leonida
O Libane, uti miser est homo qui amat.
Libanvs
Immo hercle vero,
qui pendet multo est miserior.
Leonida
Scio qui periclum feci.
circum sistamus, alter hinc, hinc alter appellemus.
ere, salve. sed num fumus est haec mulier quam amplexare?
Leonida
Quia oculi sunt tibi lacrumantes, eo rogavi.
620
Argyrippvs
Patronus qui vobis fuit futurus, perdidistis.
