Perde 1
[Textpart 3]
nec recte quae tu in nos dicis, aurum atque argentum merumst:
155
Cleareta
fixus hic apud nós est animus tuos clavo Cupidinis.
remigio veloque quantum poteris festina et fuge:
quam magis té in altum capessis, tam aestus te in portum refert.
Argyrippvs
Ego pol istum portitorem privabo portorio;
ego te dehinc ut merita es de me et mea re tractare exsequar,
160
quom tu med ut meritus sum non tractas atque eicis domo.
Cleareta
Magis istuc percipimus lingua dici, quam factis fore.
Argyrippvs
Solus solitudine ego ted atque ab egestate abstuli;
solus si ductem, referre gratiam numquam potes.
Cleareta
Solus ductato, si semper solus quae poscam dabis;
165
semper tibi promissum habeto hac lege, dum superes datis.
Argyrippvs
Qui modus dandi? nam numquam tu quidem expleri potes;
modo quom accepisti, haud multo post aliquid quod poscas paras.
Cleareta
Quid modist ductando, amando? numquamne expleri potes?
modo remisisti, continuo iam ut remittam ad te rogas.
170
Argyrippvs
Dedi equidem quod mecum egisti.
Cleareta
Et tibi ego misi mulierem:
par pari datum hostimentumst, opera pro pecunia.
Argyrippvs
Male agis mecum.
