Perde 5
[Textpart 8]
Iam hoc aliud est quod gaudeamus: miles pellitur foras.
1040
CHAEREA
Tum tu frater, ubi ubi est, fac quam primum haec audiat.
THRASO
Numquid, Gnatho, tu dubitas quin ego nunc perpetuo perierim?
GNATHO
Sine dubio opinor.
CHAEREA
Quid commemorem primum aut laudem maxime?
Illumne qui mihi dedit consilium ut facerem; an me qui ausus sim
Incipere? an fortunam collaudem quae gubernatrix fuit;
1045
Quae tot res, tantas tam opportune in unum conclusit diem?
An mei patris festivitatem et facilitatem? O Iupiter,
Serva, obsecro, haec nobis bona.
PHAEDRIA
Di vestram fidem, incredibilia
Parmeno modo quae narravit: sed ubi est frater?
CHAEREA
Satis credo: nihil est Thaide hac, frater, tua
1050
Dignius quod ametur; ita nostrae omni est fautrix familiae.
PHAEDRIA
Mihi illam laudas?
THRASO
Perii, quanto minus spei est, tanto magis amo.
Obsecro, Gnatho, in te spes est.
